#قصتي_مع_عشيرتي
الجزء الاول
قبل ماندبا فالقصة معنى كلمة عشيرتي ماشي هو صاحبتي عشيرتي هي ديك البنت لي تانعاود ليها وتعاود ليا تاتعرف صاحبتي وتانعرف صاحبها ملي تانتخاصم مع صاحبتي هي لي تاتعاوني نقاد الستونات ملي تاتكون مقودة عليا فشي بلان هي لي تاتجي تونسني بمعنى عندي عشيري وعشيرتي نتمنى تكونو فهمتو اش تانقصد
المهم كانت عندي عشيرتي سميتها دنيا كانت بيناتنا صداقة زوينة وكنت مصاحب مع وحدة سميتها لمياء ، المهم كانو تايعرفو بعضياتهوم نظرا لاننا كنا تانخرجو مجموعين انا ولمياء ودنيا وصاحبها وصاحبها واخا يشوفني تاندوي معاها بيني وبينها او تانضحكو تاتجيه عادي حيت عارفنا غير عشران ومابيناتناش وحتى صاحبتي ماكانتش تاتغير منها ملي تانجبدها فالهضرة
المهم العشرة تاعي مع دنيا عندها 4 سنين ولمياء يلاه تصاحبت معاها بشي 8 الاشهر
المهم القصة اتبدا نهار انديرو واحد الخرجة حنى بـ4 لواحد الجبل باش ندوزو فيه النهار وعاقل كانت ديك الساعة بحال هاد الوقت فالعطلة تاع نصف السنة عاد شدو الدراري النتائج وبما انه لمياء ودنيا جابو نقطة زوينة خلاوهوم دارهوم يخرجو اه ودنيا الواليدة تاعها تاتعرفني مزيان وشحال من مرة تانمشي عندهوم لدار فحالة الى كانت عندهوم شي حاجا يعني كيف قلت ليكوم دنيا كانت بحال شي عشير
المهم ماعليناش خرجنا مجموعين وتافقنا باش نمشو مع 7 دصباح نشدو الطريق لكن الواليدة تاع دنيا قالت ليا جي عندنا فالصباح باش تمشي معاك دنيا مانقدرش نخليها تخرج بوحدها فداك الصباح
وداكشي لي كاين وصلات ديك 6:30 صونات لي دنيا قالت ليا
جي عندي دابا لدار باش نجمعو الحوايج لي خاصنا ندو ونمشيو
مشيت عندها جمعنا داكشي لي خصنا الطاجين الخضرة لي اندو معانا المهم راكوم عارفين الخرجة اش تاتبغي لكن انا كنت جايب معايا شي زويتا تاع الكيف والحشيش باش يطلع ليا النهار واعر وانا دارب فالحساب بلي عشير دنيا مامبليش يعني هو يرد البال الى انا تبوقت
المهم شدينا الطريق مشات دنيا دقات على لمياء خرجاتها لقينا صاحب دنيا تايتسنانا قدام البلاصا فين انشدو الطوبيس
المهم ملي طلعنا لطوبيس شدينا بلايصنا جالسين شويا هيا طلع واحد المرا كبيرة هي وبنتها عندها شي 10 سنوات
انا نضت من بلاصتي وخليتها تجلس فيها جنب لمياء وديك المرا حطات بنتها فوق رجليها هي تنوض دنيا قالت ليها اريها تجلس هنا وخلاتها تجلس فبلاصتها حدا صاحبها وهي تجي توقف حدايا قالت ليا والله مانخليك دي الاجر بوحدك نتقاسموه بجوج
صافي بقينا ضاحكين فالطريق وراكوم عارفين الطوبيس فالمغرب كيف تايسوقوه الشيفورات المحتارفين تايضرب دورة بنادم كاملو تايطيح لجنب
وداكشي لي طرا وصلنا لواحد الدورة هو الشيفور يدير فيها شوماخار وضرب دورة تاع بيه فيه وبنادم كولشي تكب لجنب وهي طيح عليا دنيا وبقات شادا فيا وحنى ملاصقين
بديت تانشوف فيها هي تهز عينيها فيا وبقات تاتشوف وساكتا
ملي تقادينا هي تحدر راسها مابقاتش دوات وتانا سكت وبديت تانفكر مال هادي ؟ علاش دارت دوك الشوفات وسكتات ؟
وانا نقوليها : مال بنادم ساقل فاش تاتفكري
هي تبدا ضحك قالت ليا والو
قلت ليها واش هانيين ؟ ياك ماكاين باس ؟
قالت لي لا اصاحبي ماطرا والو غير انا سهيت
صافي وبقينا ضاحكين تاوصلنا لمنطقة لي بغينا المهم هبطنا من الطوبيس وكاينا قدامنا يمكن شي 20 دقيقة تاع المشية بالرجل عاد انوصلو لداك الجبل
انا ولمياء تانتمشاو ورجعنا لور ودنيا وصاحبها قدامنا
لكن وحنى غاديين مرة مرة دنيا تاتعاود تلفت عندنا وتادير فيا نفس الشوفات لي دارت فالطوبيس بحال الى باغا تقول شي حاجا وماقاداش